Emdroadur al labour-douar biologel
Labourer-douar e bro Gwitreg eo Michel Davenel. Ugent vloaz zo en deus dibabet al labour-douar biologel. Displegañ a ra reolennoù an doare labour-douar-se.
Diorren al labour-douar askoridik en deus degaset cheñchamantoù bras d’an endro : etre 1970 ha 1995 eo bet lieskementet dre bemp feur an nitratoù en dour hag an traezhennoù zo bet aloubet gant bezhin glas, dreist-holl abalamour da implij produoù kimiek (temz ha diastuzerioù) ha d’ar skuilhañ teil ha dour-hañvouez o tont eus an desevel moc’h. Ur gudenn vras eo e Norzh Penn-ar-Bed hag en Aodoù-an-Arvor. Ar saotradur-se zo ur gudenn evit an dud rak n’hellont ket evañ an dour-red, ha fall eo evit brud vat ar vro a zo diazezet ivez war an natur hag ar beved.
Emskiantañ ar c’hevredigezhioù a-vicher zo bet diwezhat a-walc’h – an taol brudañ « Bretagne eau pure », kaset da benn a-gevret gant ar galloudoù publik e 1988 – ha sturiadoù Europa e penn kentañ ar bloavezhioù 90 zo bet divizoù a-bouez.